Turiturian: Andorang so adong dope Komisi Pemberantasan Korupsi

Nigurathon ni : Laris Naibaho bin Amaronal alias Ompung ni si Malona.

Dung Tukang Insiniur si Billok, jala dapotan karejo na tama di sada perusahaan BUMN di Medan, sai disangahon ibana do mulak tu Huta nasida sahali sataon, laho mandulo inong dohot amongna. Songon nasomal do parmulakna, mandapothon Natal. Dohot do diboan anakkonna suang songoni pardibajabuna. 

Muba do tuit ni nanialapna i taon on, ai nunga naek jabatan si Billok, gabe Direktur Tehnik dan Rekayasa. Boi do attong dapot roha i, ai mangihut do fasilitas na tarlobi, songon mobil dohot jabu. Mitsubishi Pajero Sport warna putih Special Edition saonari dalan-dalan ni si Billok, jala ido diboan tu huta nami, ima ibukotani Kabupaten na mansai mashur di Portibion. Tong mai ala uli ni pulo dohot danau i.

Olo matutu, biasa ma, asa songon na sangap bapakkon ninna rohani si Billok, diajak ma amongnai raun-raun di huta, mangalaosi akka tikungan, dalan na marbuntak, suang songoni mangaloasi piga-piga jambatan.

Angka dalan dohot jambatan na adong di huta i, boi dohonon, amani Billok do mambangun. Ai annemer didikan ni Buladda najolo dope among nai.
Tep, di tongan dalan, jumpang na sida ma jambatan. Songon na ragu do si Billok naeng mangalaosi. Songon na mutung ma bohina, huhut marsamburetan hata sian papanganna patuduhon songon na kesal.

“Bapa, on majolo, laos soadong do hubereng mutu (kwalitas) ni bangunan borongan ni bapa on, na bohado?”

Sip do amani Billok mambege-bege ungut-ungut ni si Billok, alai anggo hosana dang be tikkos mardalan. Hosa-hosama.
Sai didatdati si Billok mandok hatana, “ Dang markualitas, satongkin-satongkin ruppak jala holan namangarehap torus…”

Dang tartaon amani Billok be mambege hata ni anak hasianna i. Haruar ma hata sian papanganna, “ Sipma babami Billok. Anggo dang hubaen songoni, sian dia do uang sikkola dohot uang kuliahmi? Paso mobil mi, asa turun au.”

Tarhatotong ma si Billok, dung soolo among nai rap be samobil, huhut manesali. Bah.Bah.Bah. Mar babahnama ibana.

Akal Bulus Nai Hemong

Akal Bulus ni nai HEMONG

(naginurathon ni : Laris Naibaho)

***

Sipata memang, dang ditanda nai Hemong on dirina. Pattang sobilak, teal na sun. Nunga diboto amantana holan PNS golongan II A do, alai so inama godang ni pangidoanna, manang lebih sossok dohonon, tuntutan.

Amani Hemong, biasa ma. Nunga tarleleng ibana penduduk DKI (Ditoru Ketiakni Inanta i). Sai dioloi do aha pangidoan ni niolina i. Ai molo so dileon pangidoanna, tor sai martepe-tepe do hata ni inantana i, huhut sai mandok, “Pulang kan saja, aku pada ibuku, atau ayahku.” Sabotulna, sai naeng do paulakonna inanta na i, alai mardua roha amani Hemong. Alana ende ni nai Hemong mandok, “Pulang kan saja aku pada ibuku atau ayahku.” Ai, panirang-nirangon do hape simatuana, gabe mardua jabu. Broken home istilah na. Gabe dipasombu jala diolo-oloi ma pangidoan ni inanta na i. Memang, dapot roha do alasan na deba nari. Soi nama ulini nai Hemong on. Sai ro do ijur ni akka ama-ama, apalagi amama na sotarpissang, molo mamereng body ni nai Hemong on. Ibarat mobil, BMW seri 5 terbaru ma.

Di sada tingki, mandapothon sore, tardipapodom-podom nai Hemongma di podoman nai. Ditempelhon muse salompas dibohina kiri-kanan dohot dipardompakonna.

Pas mulak sian kantor amani Hemong, dibereng ma tutu inanta nai namaheu bohina, huhut bersin-bersin. “Bah, Nai Hemong, ai na mahua ho?”

“Mahua dope nimmu, dang diberengho iba naung malos songon nanaeng mate?” ninna Nai Hemong mangalusi.

“ Naeng mate? Unang jo, unang mate joho, Alana dang tuntas dope pangkataionku dohot boru Sileban i. Jolo olo ma ibana, asa mate ho,” ninna amani Hemong, saotik margait. Maksudna asa mengkel nian nai Hemong.

“Aha nimmu? Tanda do sibolis di pingkiranmu. Iba naeng mate, hape songoni muse hatam? Paulak au…”

Amani Hemong pe tarotokan ma. Manesal ibana namargait i. Ai nunga gabe beringasan nai Hemong. Alai hatop dikuasai ibana pikkiranna.

“ Molo boti, beta ma tu dokter. Tu dokter Marulakloni mahita lao. Songon na jamot do jama-jamana. Beta ma!”

Tor ringgas do attong lakka ni nai Hemong. Di bagasan rohana, tombus do nanaeng paoto-otohon amani Hemong.

Masuk ma nai Hemong tu ruang periksa, nung jolo dijouhon suster Ngesot.

Diperiksa dr.Marulakloni ma attong dohot teteskop na. Bingung do dokter i. Songon na soadong do sahit ni nai Hemong.

Dung haruar nai Hemong sian ruang periksa, tor songon na marlojong do amani Hemong,. “Aha do ninna sahitmu, Hasian?”

“Dang adong ninna dokter i. Alai stress berat. Porlu ninna Isterahat total. Unang sai dijabu, jala ikhon pesiar , huhut belanja-belanja. Ido ninna ubatna.”

“Boha?”

“Molo boi nian, boan ma au mardalani tu Singapura, manang Hongkong manang tu Australia. Holan ido, didok dokter ubat ni sahit hon.”

“Daga, daga, daga. Na sala observasi do dokter i. Beta, tu datu na di dolok-dolok an ma hita lao, datung ala ni sahit mi gabe ikhon gabe korupsi au…Paliasssssssssssssssssssssssss!” 

***